Sundfélagið Ægir varð í gær Reykjavíkurmeistari 2022.

Þá urðu Ægirringarnir Sunna Arnfinnsdóttir og Birgir Hrafn Kjartansson stigahæstu sundmenn mótsins í sínum aldursflokkum.

Mótið sem venjulega er haldið í janúar ár hvert var haldið seinna í ár vegna COVID faraldursins. COVID kom þó við sögu á mótinu en nokkrir sundmenn gátu ekki tekið þátt eftir að hafa greinst með sjúkdóminn. Þrátt fyrir að nokkrir sundmenn félagsins í aldursflokkum gætu ekki tekið þátt allt mótið vegna æfingarhelgar Framtíðarhóps Sundsambandsins þá náði félagið að verja titil sinn frá í fyrra, en Ægir varð einnig Reykjavíkurmeistari árið 2021.

Þetta er sérstaklega ánægjulegur árangur þar sem félagið fagnar 95 ára afmæli sínu í dag. Við minnum af því tilefni á afmæliskaffið á annarri hæð Laugardagslaugar í tilefni dagsins. Allir sundmenn, núverandi og fyrrverandi og velunnarar félagsins eru velkomnir.

Við óskum sundmönnum og þjálfurum til hamingju með þennan glæsilega árangur á stórafmælisárinu!

Stjórnin.

Sundfélagið Ægir verður 95 ára á sunnudaginn kemur, þann 1. maí.

Í tilefni dagsins verður hefðbundin afmælisdagskrá í Laugardalslaug sem hefst kl. 13:00.

• 13:00 Bleikjusýning. Sundmenn úr Bleikjuhópum félagsins Í Breiðholtslaug sýna framfarir og árangur sem þeir hafa náð.
• 13:30 Krónusund. Áheitasund fyrir sundmenn í Höfrungum, Löxum, Brons-, Silfur- og Gullhópum (sjá neðar) sem eru að safna fyrir æfingaferðum ársins.
• 14:00 Afmæliskaffi og kræsingar fyrir alla sundmenn og velunnara félagsins og á meðan veitingarnar endast. Allir velkomnir!

Forráðamenn Bleikja sem vilja taka þátt í Bleikjusýningunni eru vinsamlegast beðnir að fylgja börnum sínum í gegnum fataskipti og inn að laugarbakka innilaugarinnar fyrir kl. 13:00, og vera viðstaddir á meðan á sýningunni stendur. Símon þjálfari tekur við krökkunum á laugarbakkanum.

Krónusund er fjáröflunarsund þar sem synt er í ákveðinn tíma og sundmaður safnar áheitum á hversu marga metra hann nær að synda á þessum tíma. Lágmarks áheit er 1 kr. á hvern syntan metra. Þannig fær sundmaður sem nær að synda 1000 metra á tilskildum tíma 1000 kr. frá hverjum þeim sem heitið hafa 1 krónu á sundið, 2000 kr. hjá þeim sem heitið hafa 2 krónum á sundið. og svo framvegis. Hér er krækja á áheitablað sem sundmenn prenta út og nota til að safna áheitum en nauðsynlegt er að fá undirskrift á slíkt blað frá hverjum þeim sem heitir á viðkomandi sundmann. Krónusund

Höfrungar og Laxar munu synda í 15 mínútur og Brons-, Silfur- og Gull- hópar í 30 mínútur. Skila verður inn áheitablöðunum til þjálfara eða yfiþjálfara fyrir sundið.

Stjórn og þjálfarar.

Sundfélagið Ægir hélt Aðalfund félagsins þann 29. mars síðastliðinn.

Megin niðurstöður fundarins voru eftirfarandi:

• Helgi Þór Þórsson var kjörinn formaður félagsins til næstu 2ggja ára.
• Ásgeir Ásgeirsson, Hildur Björk Kristjánsdóttir og Júlía Þorvaldsdóttir halda áfram í stjórn til eins árs.
• Arnfinnur Jónasson kemur nýr inn í stjórn til 2ggja ára.

• Á fundinum var Kjartan Birgisson kjörinn áheyrnarfulltrúi foreldra fram að næsta Aðalfundi.
• Fimm fulltrúar úr röðum foreldra voru tilnefndir í foreldraráð félagsins.
• Kjör fulltrúa í SRR var vísað til nýrrar stjórnar.
• Ákvörðun um félagsgjald var vísað til nýrrar stjórnar.
• Skoðunarmaður reikninga var kjörinn Hólmsteinn Ingi Halldórsson og Pála Þórisdóttir til vara.

Aðalfundur Sundfélagsins 2022 verður haldinn þriðjudaginn 29. mars kl. 18:00 á efri hæð Laugardalslaugar. 

Dagskrá aðalfundar er sem hér segir:
   1. Setning
   2. Kosning fundarstjóra og fundarritara.
   3. Skýrsla stjórnar um liðið starfsár.
   4. Reikningar félagsins lagðir fram.
   5. Umræður um skýrslu stjórnar og reikninga. Reikningar bornir upp. 
   6. Lagabreytingar
   7. Ákvörðun um árgjald
   8. Kosningar:
       a) Kosning formanns til tveggja ára
       b) Kosning stjórnarmanna í laus stjórnarsæti til tveggja ára
       c) Kosning endurskoðanda og eins til vara
       d) Kosning eins fulltrúa til tveggja ára í SRR
   9. Staðfesting á tilnefningum í foreldraráð.
 10. Önnur mál.

Á fundinum verður kosið um laus stjórnarsæti. Þá er formaður félagsins kosinn sérstaklega. Framboð til formanns og stjórnar má tilkynna fyrir fundinn á  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. .

Lög og markmið Ægis má finna á heimasíðu félagsins. Tillögur um breytingar á lögum skulu berast formanni á  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það.  minnst þremur dögum fyrir fundinn.

Auk sundþjálfunar byggir starfsemi Ægis alfarið á vinnuframlagi foreldra og velunnara þess. Þar með talið eru stjórnarstörf, tæknistörf, dómgæsla og vinna í foreldraráði.

• Vinna í foreldraráði felur m.a. í sér fararstjórn í æfingaferðum, umsjá fatamála og fjáröflunar og að halda utan um félagsstarf sundhópa. Leitað er að tveimur einstaklingum fyrir hvern sundhóp félagsins til að taka að sér störf í foreldraráði. 
• Árlega eru auglýst dómaranámskeið sem gefa réttindi til dómgæslu á sundmótum. Foreldrar eru hvattir til að sækja þau og í framhaldinu að dæma fyrir félagið. 

Foreldrar og aðrir sem vilja upplýsingar um eða gefa kost á sér í fyrrgreind störf vinsamlegast sendið tölvupóst á  Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. . Einnig er tekið við ábendingum á fundinum.

Allir velunnarar Ægis eru velkomnir á aðalfundinn. Allir félagsmenn í Sundfélaginu Ægi hafa atkvæðisrétt á aðalfundi. Félagsmenn teljast þeir sem greitt hafa árgjald eða æfingagjöld til félagsins eða forsvarsmenn sundmanna sem greitt hafa æfingagjöld til félagsins. 

Við vonumst til þess að sjá sem flesta félagsmenn á fundinum.

Stjórnin.